【英足盃】5蛋輕取哈特斯 曼城大勝刷紀錄;復出即有助攻 迪布尼強勢回歸!

足總盃第3圈賽事,曼城主場以5:0輕鬆大勝哈特斯菲爾德,比賽過程可以話係毫無驚喜,反而迪布尼復出嗰一刻,就震撼整個伊蒂哈德球場,而且仲送上一個助攻,為復出戰振聲威!

英超五冠王主場對英冠護級球隊,大家都預計到戰情肯定一面倒,哥迪奧拿用半主力出擊,門將史提芬奧迪加,中場有列高李維斯及挪威小將卜比,科頓、基亞利殊支援萬能插艾華利斯,而已經傷癒嘅迪布尼、杜古先列後備。

前45分鐘,曼城嘅控球率超過80%,完全係碾壓哈特斯菲爾德,不過客軍嘅鐵桶陣亦頂得住一陣,去到33分鐘終於失守,科頓窄角度搞掂,揭開大勝序幕;4分鐘後,曼城藉美妙組織擴大優勢,艾華利斯完成任務,2:0返更衣室。

57分鐘,震撼人心一幕終於出現,傷癒嘅比利時孖寶迪布尼、杜古喺場邊準備入替,伊蒂哈德球場發出海嘯般嘅吶喊聲,二人一登場,曼城就由卜比挑射造成烏龍,及後科頓喺禁區頂施射整多粒,4:0;74分鐘,比利時孖寶合作,抖咗149日嘅迪布尼狀態唔錯,佢一記右路傳中,杜古凌空掃射建功,湊成5:0大捷。

呢場5:0,係曼城喺哥迪奧拿麾下第42次至少贏對手5球嘅勝仗,係同期英超所有球隊中最多。利物浦19次排第二,熱刺15次第三,阿仙奴13次第4,車路士9次排第5。曼城晉級第4圈後,有將近一個星期休息,然後回師英超作客紐卡素。