【英足盃】難破「奧脫福百年宿命」; 高普受訪因一條「愚蠢問題」 中途發火走人

強如高普,都冇辦法打破「奧脫福百年宿命」。EQ極高嘅佢,周日英格蘭足總盃8強戰畀曼聯淘汰之後,更罕有地發記者脾氣,訪問中途離場。

又難怪高普咁㷫,雖然曾經兩度領先,但法定時間同加時末段,都被曼聯追平,喺加時嘅補時階段仲要輸埋,被迪亞路絕殺,輸3:4完場,高普4冠王就此夢碎。

據統計,曼聯主場對利物浦嘅足總盃比賽,已經有超過100年冇輸過波,兩隊上一次足總盃交手亦喺奧脫福進行,最終曼聯3:2淘汰利物浦。此外,2011年兩隊亦有於足總盃碰頭,當時曼聯主場1:0取勝。

賽後,一位來自挪威媒體V Sport嘅記者喺混合採訪區訪問高普,問佢點解利物浦嘅比賽節奏,喺加時階段急速下滑。高普聽完之後好唔高興:「呢條問題有啲愚蠢,如果你經常睇我哋比賽,下次可以問我哋點解體力會咁好。」

高普繼續答:「我哋近來踢咗唔知幾多場比賽,我亦唔知道曼聯最近踢咗幾多場比賽,足球就係咁。我對你嘅問題好失望。」當記者再提問:「所以係因為踢咗太多場比賽?」高普忍唔住,拍一拍對方膊頭,邊走邊講:「顯然你唔喺狀態,我冇乜心情應付你。」