【英足盃】貴價兵唔掂 肥普重用青訓 車仔晉級初見效果;紐卡素淘汰新特蘭 開心過歐聯晉級?

車路士豪花數億增兵,英超成績仍然令人失望,領隊普捷天奴還原基本步,喺足總盃重用青訓球員,周六第三圈主場對普雷斯頓,憑20歲前鋒波也下半場打破僵局,協助球隊以4:0淘汰普雷斯頓。普帥大讚波也潛質優厚,期望青訓小將們繼續進步。

車路士季前花費過億歐元收購中場摩西斯卡些度,中場尼干古、羅美奧拉維亞轉會費亦超過6000萬歐元。雖然超揼本,但球隊成績仍強差人意,賽前喺英超只係排第10。

面對傷兵問題同射手尼高拉斯積遜離隊出戰非洲盃,普捷天奴索性重用青訓球員,20歲右閘基治利斯首當正選,同樣20歲嘅中堅高維爾做隊長,22歲前鋒波也擔正,彭馬、梅迪歷同史達寧支援呢位阿爾巴尼亞小將。

上半場互無紀錄,換邊後戰至58分鐘,青訓前鋒波也接應馬路古斯圖妙傳打破僵局,及後車路士發揮更得心應手,堤亞高施華、史達寧及安素費南迪斯先後建功,藍戰士大勝4:0,順利躋身第4圈賽事。

同日早場,紐卡素喺東北打吡以3:0踢走新特蘭,喺死敵主場度大勝一場,領隊賀維、後衛丹般恩都開心到爆,賀維話:「我哋控球好勇敢,又冷靜,所有嘢都處理得好好,冇被主場球迷佔上風。」

伊沙克梅開二度,帶領紐卡素大捷。

事實上,紐卡素上月成績堅曳,今場終於大勝吐烏氣,後衛丹般恩更激動得誇張:「今日係一場好特別嘅勝利!如果你問紐卡素球迷,寧願歐聯晉級定還是贏新特蘭,我認為佢哋寧願擊敗新特蘭!講到底,今日真係偉大嘅一日!」