一支穿雲箭，千軍萬馬來相見！憑哈維艾利洛一個超級吊射，利物浦喺英格蘭足總盃第3圈重賽，作客以1:0淘汰狼隊，取得2023年首勝，保持衞冕機會。
英超二連敗後，利物浦總算打番支強心針，喺周六（年卅晚）大戰同病相憐嘅車路士前，信心同士氣都有所提升。
沙拿、艾利臣比加、羅拔臣、麥迪比做後備，達雲紐尼斯、雲迪積克有傷，兵源不足，嚟緊又有大戰，今場唯有用多位副選上陣，好彩仍憑哈維艾利洛13分鐘入波，奠定勝局。
哈維艾利洛只有19歲，呢個入波極有膽色，由中場線附近起長驅直進，跟住離門約30碼笠射，笠死對手門將。呢位小將賽後話，入波要多謝老大哥占士米拿：「我推波嗰陣，佢一直大聲叫我射喇！射喇！畀咗我信心去起腳。」
雖然晉級，但利物浦衞冕之路依然非常艱難，第四圈要對白禮頓。雙方近5次碰頭，利物浦僅一勝，日前英超交手，紅軍更慘吞三蛋。
今仗另一焦點球員，係荷蘭前鋒加普，但唔係話佢好波，而係繼續冇料到，加盟利物浦後，踢咗第三場波，唔單止同隊友未有默契，即使有射門機會，亦射到離行離列，同世界盃決賽周時相差好遠。
加普荷甲數據強到爆，唔代表可以喺英超複製。經過3場比賽，暫時睇到佢爆發力、對抗性未達最佳狀態，加上射術仍有待改善，要喺競爭性超強嘅英超立足，仍然要多下苦功。
