【英足盃】第6次作客熱刺 攻門102次 曼城終於入波兼贏波!哥迪奥拿談高普:有覺好瞓

曼城嘗試102次攻門後,終於喺熱刺主場入波。周六凌晨英格蘭足總盃第4圈,曼城憑尼敦阿基末段一箭定江山,作客險勝熱刺1:0,衛冕路再過一關。

比賽前幾粒鐘,利物浦領隊高普突然宣佈教埋今季離隊,消息震動球壇。作為高普最強對手,曼城主帥哥迪奧拿當然成為追訪目標。光頭佬除高度評價高普,亦好幽默咁話,以後對利物浦之前嗰晩,終於可以有覺好瞓。

除咗高普難搞,熱刺自從2019年搬入新主場後,亦令哥迪奧拿極為頭痛,曼城之前共5次作客呢個球場,全敗之餘仲要冇波入,嚟到第6場累積至102次射門,終於破除魔咒。

曼城喺早段就踩油喪攻,令冇咗孫興民嘅熱刺連過半場亦有難度。7分鐘曼城小將波普擺咗個波入網,可惜被判越位。熱刺適應過後開始反攻,不過威脅性唔算大,上半場互交白卷完場。

換邊後曼城有唔少黃金機會,包括艾華利斯太老定下被奧迪加回身擋出。之後兩軍先後換入組織核心奇雲迪布尼、占士麥迪臣,當中迪布尼幾乎把握到靴爾保誤傳嘅機會,可惜最後一腳射斜。

終於嚟到曼城對熱刺合共第102次攻門,88分鐘,熱刺門將域卡連奴出迎角球失誤,尼敦阿基近門撞入,曼城險勝熱刺1:0晉級。