【英足盃】第13次!曼聯快攻醒神 2:1贏曼城捧盃;坦克食尾胡 1年1盃 有冇得留低?

坦克留隊有轉機!周六英格蘭足總盃決賽,曼聯穩守突擊成功,以2:1擊敗曼城,報番上屆決賽落敗之仇,第13次捧盃。

賽前多個英國媒體均指出,今場無論勝負,曼聯都會炒領隊坦哈格。不過今場決賽,曼聯確實踢得好,成功阻止曼城成為英格蘭首支單季衞冕聯賽、英足盃球隊,而且坦克上季初上任亦攞到聯賽盃,一年一個盃,會唔會都保得住帥位呢?

曼聯今場變陣,單箭頭出般奴費南迪斯,拉舒福特、麥湯、加拿祖支援,雙防中用明奴、安拉拔,擺明穩守突擊。而曼城控制戰局時間雖然較多,亦谷得頗前,但冇辦法撕破利辛度馬天尼斯、華拉尼拍住嘅防線,更被紅魔快攻砌到散晒。

30分鐘,曼聯一個後場長傳,加拿祖雖然企喺越位位置,但未有觸球,點知加度華爾頭槌回傳,同出迎門將史堤芬奧迪加出現誤會,益晒加拿祖先開紀錄。曼城球員包圍球證抗議,但球證認為加拿祖冇觸球,所以冇越位。

38分鐘,拉舒福特僅僅越位食詐胡,但唔緊要,因為1分鐘之後就堅2:0。又係快攻,加拿祖右路傳入禁區,般奴費南迪斯第一時間嚟個no look pass,19歲小將明奴第一時間順勢入波,一氣呵成,靚波!

哥迪奧拿下半場即換入扭波王杜古,係有啲起色,但衰在冇運,夏蘭特個人第一個有威脅射門又中楣。祖利安艾華利斯亦有黃金機會,但只係面對奧拿拿,嘥料射唔中目標,

曼聯有番利辛度馬天尼斯打中堅,穩陣好多倍,但佢74分鐘傷出,曾經令人擔心,但曼城去到87分鐘,由杜古追至較接近紀錄。但呢球嚟得太遲,曼聯最終保住2:1勝果,下季有得踢歐霸盃。