【英足盃】瘋狂失機3連敗 0:2負殘陣利物浦;阿仙奴再唔買前鋒 今季勢必玩完

真係要快啲買前鋒,伊恩胡禮都係咁話!周一凌晨英格蘭足總盃第3圈重頭戲,阿仙奴主導形勢下射極唔入,反而比賽後半段連失兩球,主場以0:2不敵利物浦,連同英超在內累積3連敗。

今場xG又有1.89球,但係又食蛋,連埋之前兩場,總xG達6.47球,但只入得1球兼連輸3場,從客觀數據嚟睇,已經話晒畀你知,阿仙奴有幾需要買前鋒。

尤其加比爾捷西斯受膝傷困擾,未知要抖幾耐,阿仙奴今場用夏維斯、尼爾遜、薩卡組成進攻線,門將用番藍斯度,而利物浦則有沙拿、遠藤航、雲迪積克及蘇保斯拿爾等多名主力缺陣,前面用紐尼斯拍迪亞斯及加普。

開賽10分鐘內,阿仙奴已製造4至5腳射門,尼爾遜3分鐘就接應長傳,扭過埋門將艾利臣,但窄位起腳只中網側;之後再有奧迪加特射中楣,夏維斯亦起碼有3至4次起腳,都無法打開缺口。半場射門係13對2,阿仙奴禁區內共10次起腳,5腳中框,但只能交白卷。

上半場捱打嘅利物浦,下半場加強突擊,至於掌控比賽節奏嘅阿仙奴,繼續有薩卡及夏維斯忘帶射門鞋。踢到77分鐘,利物浦開始嚟料,藍斯度撲走迪亞斯射門,隨後祖達中楣,兵工廠警號已響起;終於到80分鐘,阿諾開出罰球,阿仙奴後衛基維柯頭槌擺烏龍,落後0:1。

基維柯擺老烏

阿仙奴反撲不成,並喺補時5分鐘,再被紅軍突擊得手,由迪亞斯錦上添花,利物浦鎖定2:0勝局,闖第4圈。

阿仙奴唔單止3連敗,近7仗更僅得1勝,好多場都係贏形勢但入唔到波,名宿伊恩胡禮呼籲阿迪達,盡快喺轉會窗關閉前簽前鋒,否則除冠軍無望,前4都會非常危險。不過達Sir就暗示未必能如球迷所願:「球隊需要係一件事,做唔做到係另一回事。依家買人好似唔太現實,我嘅工作係激發球員嘅潛能、提升佢哋嘅表現。」