【英足盃】最強拍檔!迪布尼4次助攻 夏蘭特入5球狂破紀錄;曼城16強炒盧頓 哥帥:冇嘢好講

呢個組合堅離晒譜!周二凌晨英格蘭足總盃16強,曼城作客6:2大炒盧頓,輕鬆晉級。兩大進攻王牌奇雲迪布尼同艾寧夏蘭特盡展一流默契,前者4度助攻,協助夏蘭特轟入5球。

今次係夏蘭特自去年3月歐聯鬥RB萊比錫後,第2次為曼城單場入5球,成為球隊歷史上、第一位兩次入5粒嘅球員;夏蘭特亦係自1970年佐治貝斯之後,第一位頂級聯賽球員喺足總盃單場入5球。

紀錄仲未破完,夏蘭特5球當中,有4球助攻係來自奇雲迪布尼,呢個亦係自2020年9月、熱刺哈利卡尼4度助攻孫興民後,首次有英超球員單場4次助攻同一隊友。

查實曼城一向對足總盃好有誠意,今場強陣出擊,僅3分鐘,迪布尼左路傳中,夏蘭特門前撞入;18分鐘,夏蘭特傳畀迪布尼後走位,迪布尼直線,夏蘭特射成2:0。40分鐘,迪布尼妙傳,夏蘭特半單刀搞掂,奇勒於臨完半場前及換邊後8分鐘連入兩球,為盧頓追近成2:3。

以為有懸念,其實係冇嘅!55分鐘,迪布尼第4次助攻,又係夏蘭特,曼城拉開至4:2。之後夏蘭特入多球,加上高華錫錦上添花,最終曼城大勝6:2完場。

賽後曼城領隊哥迪奧拿,梗係大讚兩大球星啦:「我仲可以講乜?夏蘭特狀態大勇,佢同迪布尼係完美組合。迪布尼需要夏蘭特,夏蘭特需要迪布尼。夏蘭特要有一位視野極闊嘅拍檔,迪布尼就需要夏蘭特嘅走位。」夏蘭特賽後亦話:「同迪布尼踢波真係好開心,我哋都知道對方需要啲乜嘢。」