唔駛出動兩大攻擊王牌，曼城喺英格蘭足總盃第3圈主場出擊，仍然以4:0大炒車路士，照咁睇，車仔領隊樸達嘅帥位似乎真係凍過水喇。
樸達今場想唔放棄足總盃都唔得，超過10名傷兵情況下，再收起部分主力，擺明留力砌聯賽。車仔近8場英超僅1勝，只排第10位，周五凌晨作客富咸，輸埋真係隨時要護級，唯有作出取捨。
後防大將堤亞高施華等主力先列後備，改用賀爾、杜利奧查洛巴、堪富利斯3位副選；前鋒線傷埋史達寧、普列錫，奧巴美揚後備都冇份，得番一個夏維斯。
至於曼城亦收起奇雲迪布尼、艾寧夏蘭特，用世界盃冠軍成員祖利安艾華利斯做正前鋒，但一樣夠殺有餘，攻到車仔氣咳。23分鐘，馬列斯主射自由球，角度靚到絕，為主隊先開紀錄。
30分鐘，夏維斯做咗一拳超人，角球回防時出拳犯手球，祖利安艾華利斯主射12碼，2:0。38分鐘，一個流暢推進，基爾獲加底線傳中，科頓射成3:0。
車仔上半場唔單止零攻門，就連半場都好難過到，換邊後換走埋夏維斯，調入科特迪瓦年輕前鋒大衛科芬拿；由於曼城未有加強壓力，車仔攞番些少攻勢，但都欠缺威脅，反而完場前輸多個12碼，馬列斯射成4:0。
曼城第3圈淘汰完車仔，第4圈又好大機會對勁敵，抽籤後要對阿仙奴vs牛津聯勝方。曼聯主場對雷丁、熱刺作客普雷斯頓，都有較高晉級機會。衞冕冠軍利物浦，如果重賽淘汰狼隊，將會作客白禮頓，都唔容易過關。
爆開就爆，繼前一日紐卡素、諾定咸森林、般尼茅夫畀低組別球隊淘汰後，阿士東維拉周日主場對英乙史堤芬納治，竟然輸1:2，提早畢業。
