【英足盃】宣佈離開後首戰 晏菲路山呼海嘯 高普無限感恩;留低珍貴資產 青訓球員做主角

周一凌晨英格蘭足總盃第4圈,利物浦主場5:2贏英冠諾域治。一個正常賽果,但藴含不凡意義,而且令人感動。

高普宣布教埋今季離隊之後,今仗係首場賽事,晏菲路球場籠罩感激及支持之情,令佢深受感動,教波如此,夫復何求?

現場滿眼都是寫上他感激字句的橫額,場內熱播會歌”You’ll Never Walk Alone”。高普用手放胸前,心神領會。對方諾域治領隊大衛華拿,原來係球員時代拍檔,亦為高普結婚時做伴郎,兩人賽前擁抱,別具意義。

高普賽後說:「我感受到,真係非常令人感動。我講過大家唔需要咁做,因為已經心照。喺比賽時,我哋需要成為戰士,唔係為咗場邊一個老嘢。球迷向我展示佢哋對我嘅愛係好,但我哋需要群眾支持球隊,而唔係掛住領隊。依家需要忘記我會離開呢件事,專心迎戰每個對手,下一個機會是星期三。」利物浦香港時間周四凌晨英超快車會對車路士。

作為利迷,今仗除感動,亦應該感到欣慰,因為幾位年輕青訓球員打正選,都有出色表現,顯示高普留低珍貴資產畀未來嘅利物浦。

16分鐘,19歲中場麥干尼靚傳,22歲居迪斯鍾斯入楔頂入,利物浦領先。雖然好快畀諾域治扳平,但18歲右閘貝特利28分鐘策動一次精彩埋門,由達雲紐尼斯射成2:1。

居迪斯鐘斯53分鐘由自己後半場放出長傳,造就祖達射成3:1,之後雲迪積克後備上陣頂成4:1,諾域治追番一球之後,賴恩格雲貝治95分鐘頭槌埋齋,助攻又係18歲嘅貝特利。

利物浦贏5:2晉級,16強將對屈福特或修咸頓,其餘賽事抽籤結果:

盧頓 VS 曼城
狼隊 VS 白禮頓
錫周三/高雲地利 VS 梅德斯通聯
布里斯托城/諾定咸森林 VS 曼聯
利物浦VS 屈福特/修咸頓
般尼茅夫 VS 李斯特城
車路士/阿士東維拉 VS 列斯聯/普利茅夫
布力般流浪/域斯咸 VS 紐卡素