三笘薰好波！周日英格蘭足總盃第4圈，呢位日本天王玩謝利物浦，全場表現精彩，補時更射入超級靚波，帶領白禮頓反勝2比1。紅軍繼英聯盃後，足總盃亦宣告衞冕失敗。
計聯賽成績，白禮頓多利物浦2分，上月中碰頭時，紅軍更慘吞3蛋，賽前唔少人睇好近況夠弗嘅白禮頓會成功晉級。紅軍繼續有雲迪積克、麥迪比養傷，防守中路要用祖高美斯、伊巴希馬干拿迪，開波15分鐘已幾乎失守，全靠阿歷山大阿諾特於白界線前救空門，先至冇落後。
利物浦整體狀態低沉，只有哈維艾利洛較為醒神，呢位19歲球員今場又推上前鋒線，同沙拿、加普組成鋒線。可惜兩位拍檔狀態唔掂，沙拿錯失入波良機後，艾利洛於30分鐘藉半單刀，妙射遠柱網仔，為紅軍先開紀錄。
白禮頓攻勢都唔少，三笘薰延續今季出色發揮，不停左扭右扭，阿歷山大阿諾特完全睇佢唔住。39分鐘主隊已經扳平，後衞蘭普堤遠射，省中隊友李維士鄧克改變方向，收死利物浦門將艾力臣比加。下半場高普將哈維艾利洛換走，調入達雲紐尼斯，聯同沙拿、加普依然冇料到，更加凸顯三笘薰有幾好波。
92分鐘，白禮頓逼得罰球，艾斯度比倫左路傳去遠柱，三笘薰控球、先挑過祖高美斯、再彈射遠柱破網，三腳波一氣呵成，全部右腳搞掂，精湛個人技術，表露無遺，白禮頓亦憑呢個精彩入波，打入英足盃16強。
