【英足盃】兩蛋贈韋根 曼聯晉級後再抽絕世靚籤;海倫狂失機 堅尼怒插:嬲到爆!

英格蘭足總盃係唯一爭標希望,即使對手只係甲組仔韋根,曼聯一樣精銳盡出,最終成功以2:0輕取對手,殺入第4圈之餘仲要抽超靚籤,嚟緊對手只係英乙紐波特郡或非聯賽球隊伊斯列治,晉級冇難度。

新高層拉特克利夫、巴斯福特同白蘭斯今仗都有入場觀戰,曼聯亦順利打響2024年頭炮。面對韋根,曼聯派海倫擔任正前鋒,拉舒福特、加拿祖側擊,般奴費蘭迪斯支援,鋒線星光熠熠,上半場共有17次攻門,但把握力認真一般,只能喺第22分鐘由達洛治禁區邊熨射打破缺口,半場領先韋根1:0。

達洛治妙射開紀錄。

去到下半場,曼聯依然射極唔入,要戰至74分鐘,般奴博到12碼後親自主理,成功中鵠後先為曼聯鎖定2:0勝局。

曼聯今場波共有33次射門、14次中框,但只係入兩球,賽後坦哈格被問到點睇球隊把握力,佢話:「淨係上半場,我哋都製造咗5、6個黃金機會,我哋係應該入多啲波,可惜我哋冇好好把握……不過我想講,我哋製造到咁多機會,係OK嘅。」 

坦哈格冇怪球員,但名宿堅尼就唔係咁睇,佢賽後怒轟海倫:「我知好多人同情海倫,但你哋真係太好人,如果我係領隊,我一定嬲到佢爆!一位代表曼聯嘅前鋒不斷錯失機會,就話佢係冇運,但明明係黃金機會嚟,將個波擺入網啦!」海倫今仗有4次喺10碼以內範圍起腳,包括6碼插水頭槌頂中楣、門前4碼執雞踢出界。

曼聯晉級第4圈後,對手係英乙紐波特郡對非聯賽伊斯列治嘅勝方。呢圈仲有唔少矚目大戰,包括衛冕冠軍曼城作客熱刺、車路士主場鬥阿士東維拉。