【英足盃】世紀烏龍加12碼唔入!後備兵幫雙廢補鑊 車路士淘汰李城入4強

雖然輸咗球超級烏龍,又有12碼宴客,車路士周日主場仍以4:2淘汰李斯特城,打入英格蘭足總盃4強。兩位後備建奇功,入替快樂足球史達寧同冇建樹嘅梅迪歷,令車仔執番身彩。

車路士聯賽死得,聯賽盃又錯失大量機會,決賽輸畀利物浦,億億億萬大軍得個英足盃仲有得爭,幾大砌盡佢,上半場已領先兩球。

古古列拿13分鐘先開紀錄,跟住史達寧再做「快樂男孩」,先後12碼宴客同單刀射失,但佢46分鐘將功補過,助攻畀高爾彭馬建功,令車仔上半場領先2:0。

李城喺英冠帶頭,下季有機會重返英超,但上半場完全處於劣勢,冇一個中目標射門,以為佢會輸多幾粒,點知去到51分鐘,車仔有個超級無間道幫拖,令局勢完全改變。

真係世紀烏龍,起碼冠絕2024,車仔迪沙斯喺對手迫搶之下,離門超過40碼大腳回傳,球速仲要鬼咁急勁,但佢起腳之前,冇睇到門將羅拔山齊士走出咗少少,結果個波直接飛入空門,李城多謝都嚟唔切,追近1:2。

一個超級烏龍,即時此消彼長,李城自信大提升,馬維迪迪62分鐘左路舞龍咁舞,最後盪射遠柱,以刁鑽角度收死羅拔山齊士,李城追和2:2。

史達寧唔掂,天價神將梅迪歷更加隱形,即使對手有杜爾加倫喺73分鐘被逐,但打多個都冇乜優勢,佢兩個亦先後被換離場,球迷唔駛再眼冤。

冇咗兩隻黑腳,打多個嘅車仔,攻勢當堂入晒肉,雖然「嘥料專家」積遜又近門炒高,但後備卡尼卓克禾美卡,92分鐘同高爾彭馬整個美妙配合,近門射成3:2,另一後備馬杜基98分鐘更射入超靚世界波,車仔最終贏4:2入4強。