【英足盃】「嘥料王」積遜幫手!曼城1:0車路士 第13次入決賽;哥頭佬開火鬧爆賽會

曼城第13次打入英格蘭足總盃決賽!周六晚4強戰,曼城1:0贏車路士,要多謝對手前鋒積遜多次黃金餐士唔入,球證亦疑似漏判基亞利殊手球,造就曼城過關。

曼城距離衞冕英足盃只有一步之遙,之前12次入決賽,戰績係7勝5負,今次決賽會對曼聯或高雲地利,兩隊周日晚喺溫布萊球場對戰。

車路士近12仗不敗,季尾明顯上力,特別係前曼城全能攻擊王高爾彭馬,狀態非常突出,入波助攻都咁掂,但今場隊友唔爭氣,錯失晒晉級機會。

曼城周中歐聯主場狂砌皇家馬德里,但射極唔入,最終去到互射12碼被擯出局,衛冕三冠王夢碎,今場更有中鋒艾寧夏蘭特因傷缺陣,同車路士形勢更為接近。

計全場埋門,車路士嘅餐士其實更有威脅,淨係「嘥料王」尼古拉斯積遜,已經浪費兩個單刀、一次頭槌嘅黃金機會,上半場曾扭過曼城門將史提芬奧迪加,但佢見窄位唔敢直接射門,選擇回傳隊友,結果攻勢被破壞,下半場積遜又有單刀,但太早起腳被救出。

之後車仔又有禁區邊罰球,彭馬直射,負責做人牆嘅基亞利殊手部有觸球,但球證冇表示。曼城大難不死,去到84分鐘,貝拿度施華射入全場唯一入球,驚險晉級。

曼城雖然贏波,但其實中間只係休息咗3日,領隊哥迪奧拿對於賽程編排好不滿:「根本係唔可以接受!對球員嘅健康嚟講,呢個編排係冇可能、完全唔正常!我哋好想踢波、亦好鍾意踢波,但係比賽真係太密太多,我唔明白我班球員,係點樣可以撐到依家!」