英超周六凌晨，展開2023-24年新球季，上季車路士歷盡滄桑，新季成績惹人矚目。陣容大變連波衫冧把都大兜亂，但有個老冧，人人避之則吉，怕畀魔咒纏身。
普捷天奴執掌車仔，第一擊係周日晚對利物浦，開鑼最強戲碼，亦係對肥普最嚴峻考驗。
新帥上場，車仔陣容難免變動，有出有入，走人唔少，波衫號碼唔少謄空，有得揀，先至最好玩。
現時有不少「靚冧巴」空出，任君選擇，史達寧繼承了簡迪原有7號，梅迪歷上季一無是處，仍然可以改著10號，原10號仔、「美國隊長」普列錫已轉會。
阿根廷中場安素費蘭迪斯，接過轉投曼城的高華錫8號，馬度亞基成為11號仔。古古列拿、般奴巴迪亞斯分別變成4、5號，剛續約的新星高維著26號，意味球會睇好佢成為新泰利。
雖然車路士簽入了尼干古、尼高拉積遜兩名射手，但未有交予9號波衫，兩人分別為18號、15號。
車仔9號波衫，上季屬於奧巴美揚，依家冇人吼，真係怕佢有魔咒，之前9號仔奧巴美揚、盧卡古、希古恩、莫拉達、法卡奧，通通成為水貨，可謂生人勿近。
盧卡古、薛耶治都未獲分配號碼，普捷天奴擺明唔預佢兩個，新球季轉會只係遲早事。
