【英超重開】6連勝!紐卡素作客炒李城 再咁砌落去 唔止爭前4咁簡單!

真係冇人頂得住佢哋!英超重開,紐卡素一啲都冇走樣,作客3:0大炒李斯特城,升上聯賽第二位,再咁踢落去,堅唔係爭前4咁簡單,直情有爭標機會喎!

英超已經6連勝,打完第16輪,紐卡素9勝6和,只係輸過1場,以33分升上第2位,比榜首阿仙奴少4分,較曼城多1分。雖然比上述兩隊踢多兩場,但只要保持目前強勢,邊個咁斷定冇其他可能?

李斯特城喺世界盃開打之前,8戰取得5勝,擺脫榜末升上第13位,狀態信心應該都唔錯,但中場主力占士麥迪臣冇出,對攻力影響都好大,碰上依然咁弗,對抗性及戰術執行度極高嘅紐卡素,真係冇晒符。

開波3分鐘,中鋒基斯活特已憑12碼,為紐卡素先開紀錄。4分鐘後又有波入,又係米基爾阿米朗,呢位巴拉圭攻擊中場,今季弗到冇朋友,入親幾乎都係靚波,佢喺右路發動攻勢,個人拉散李城守衞,再同隊友一個短傳入楔後,巧妙盪射遠柱成2:0 。

頂住對手一輪反攻後,祖連頓再喺37分鐘接應角球頂入,紐步素上半場已領先3:0。大局已定,紐卡素換邊後以防守為主,綽綽有餘,保持紀錄至完場。

同時段另一場賽事,原本係包尾嘅狼隊,喺世盃期間換領隊,由之前執教西維爾嘅盧比迪古代替般奴拿治,Boxing Day即有新帥效應,艾特盧利喺補時5分鐘入波,助狼隊作客2:1反勝愛華頓,升上倒數第3。

而最新榜末球隊係修咸頓,主場1:3不敵白禮頓,聖人已經好耐未試過包尾嘅滋味。