轉眼4年半，雲格終於再踏足酋長球場，見證住阿仙奴一班年輕球員，克服先失劣勢，以3:1反勝韋斯咸，乘主場10連勝強勢，繼續雄踞榜首，追尋久違了的英超冠軍。
雲格係阿仙奴史上最偉大主帥，但後期成績欠佳，令教授同部分阿迷交惡，加上唔想影響前東家，所以自2018年離隊後，雲格一直冇返過酋長球場。今個拆禮物日，佢終於再現身看台，現場阿仙奴球迷高唱：只有一個雲格。
情緒只屬一時，歷史會還公道，其後阿仙奴嘅成績，已經證明雲格嘅一切功勛，現任領隊阿迪達賽後更表示，將勝仗特別獻畀雲格，感謝佢為球會所做嘅一切。
因為世界盃休戰，唔少人擔心阿仙奴氣勢會被打斷，加上首席前鋒加比爾捷西斯喺世界盃受傷，需缺陣一段長時間，亦會打擊攻力。但以上憂慮，於聯賽重開首仗，都被一掃而空。
雖然上半場先輸一個12碼，但阿仙奴一班年輕球員好有信心，喺指揮官馬田奧迪加特出色帶動下，下半場展開強力反攻，布卡約沙卡、加比爾馬天尼利先後入波反超前；尼基迪亞做正選，代替加比爾捷西斯，69分鐘更射入靚波，證明自身能力，亦為主場球迷送上最佳禮物。
毫無疑問，馬田奧迪加特全場最佳，呢位挪威隊長近5仗貢獻6助攻，令阿仙奴仍以7分領先次席紐卡素，兼少踢1場。下仗係周日凌晨作客白禮頓。
