利物浦拆禮物日雙重賀禮，除作客3:1打敗阿士東維拉，亦得到荷蘭國腳加普投效，全員傷癒後，將出現6大前鋒超豪華配搭。
今次真係出人意表，正當大家以為加普必定加盟曼聯，追隨荷蘭籍領隊坦哈格，作為C朗代替者時，利物浦卻用閃電行動，成功截胡。燕豪芬官方已證實消息，加普於拆禮物日離隊，飛赴英格蘭進行交易手續。
23歲加普，於今屆世界盃表現突出，展現強大助攻及入球能力，由於燕豪芬有財政困難，故此利物浦能平價收購。據消息透露，基礎轉會費只係3700萬鎊，加上浮動條款，合約最高價值為5000萬鎊，相當抵玩。
加普能擔任攻擊線上多個位置，令紅軍配搭更靈活，等迪亞高祖達、路爾斯戴亞斯傷癒，加埋沙拿、法明奴、達雲紐尼斯，利物浦前線有6人可供調動，火力無疑更強大。
對維拉之戰，由於法明奴受傷，故此萬能Key張伯倫要推上前，同沙拿、達雲紐尼斯合作做3前鋒；VVD、佐敦軒達臣、艾利臣比加等世盃主力，同時出任正選。
維拉自艾美利代替謝拉特執教後，英超連贏兩場，但今場新帥效應消失，主場畀利物浦㩒止砌，上半場已落後兩球。
兩閘阿歷山大阿諾特、羅拔臣一個美妙配合，沙拿門前輕易射入，利物浦5分鐘開紀錄。雲迪積克死球助攻一向有威脅，37分鐘又接應角球建功，但今次係用腳，唔用頭都一樣掂。
維拉59分鐘由奧尼屈堅斯追成年較接近紀錄，之後利物浦有沙拿、達雲紐尼斯單刀失機，直至81分鐘，敗家仔紐尼斯終於做番齣好戲，但非自己入波，而係爆落底線，傳中畀後備巴積迪射成3:1。呢位後生仔只有18歲65日，係今季英超目前入波最年輕嘅球員。
雖然有助攻，達雲紐尼斯今仗依然浪費咗4個入波機會，有統計顯示，呢位一億鎊身價嘅中鋒，今季已錯失12個重大入波良機，成為英超首席敗家仔，如果佢醒少少，利物浦都真係未必需要買加普。
利物浦今季英超首度3連勝，目前仍排第6，較第4位熱刺少5分及少踢1場，下仗於周六凌晨舉行，主場對李斯特城。
