'

【英超重開】抗擊世盃陰霾!哈利卡尼展示隊長感召力 熱刺落後兩球逼和賓福特

仲世界盃?英超返嚟喇!周一晚拆禮物日,由賓福特主場對熱刺,展開傳統聖誕新年快車頭炮。熱刺收服落後兩球劣勢,作客2:2逼和賓福特。

對熱刺嚟講,最開心係見到哈利卡尼,未有受世盃惡夢纏擾,打番自己應有水準,並頂入靚波;反觀孫興民,雖然已除低面罩,仍然未能走出決賽周及今季低潮。

兩大前鋒,世界盃各懷傷痕,哈利卡尼8強對法國12碼宴客,成為英格蘭出局關鍵之一,而孫興民表現亦欠佳,南韓16強更畀巴西大炒。

呢對拍檔抖夠打正選,克羅地亞比列錫、丹麥賀積查治都喺中場押陣,只有法國龍門洛里斯、阿根廷中堅羅美路仲休息緊,陣容唔差,但前半段踢落冇釐神氣,一度落後兩球。

「小蜜蜂」真係好硬淨,冇大牌但超實際嘅賓福特,未踢今仗之前,今季僅輸過4場,輸波場數只少過紐卡素、曼城同阿仙奴,對住上半場走晒樣嘅熱刺,15分鐘已由真拿達先開紀錄。

熱刺中堅艾歷迪亞,世界盃亦有唔少上陣時間,回歸英超未瞓醒,54分鐘冇壓力下大腳解圍撻Q,無端端輸角球,結果畀賓福特中鋒艾雲東尼射成2:0。

哈利卡尼出名係職業球員典範,冇受宴客慘劇影響,做足晒本份,65分鐘更挺身而出,接應基文迪朗格勒傳中,以一個靚頭槌破網。

入咗呢球後,熱刺終於醒番展開強攻,71分鐘由古路施夫斯基助攻,賀積查治近門狂抽,追和2:2。孫興民最後一刻有射門機會,但力度不足,被對方門將撲出,和波收場。

熱刺和波,今輪仍會保住第4位,嚟緊周日晚則於主場對阿士東維拉。賓福特暫列第9,周六凌晨作客韋斯咸。