曼聯以近8個月以來英超最大勝仗，進入「後C朗時代」。周四凌晨主場3:0大勝諾定咸森林，拉舒福特入波、助攻各一，佢同王牌中場卡斯米路，俱奉獻出極高水準嘅表現，二人勢成中前場兩大核心。
贏波之後，曼聯15戰29分，繼續排第5位，比熱刺少1分但少踢1場。除拉舒福特外，中場卡斯米路亦貢獻1個助攻，據統計顯示，呢位巴西國腳自季初由皇馬轉會後，正式比賽上陣20次，期間曼聯取得15勝2和3負，勝率75%，7000萬歐元轉會費，一啲都唔貴。
英超重開，迎嚟同C朗解約後第一場聯賽，曼聯今場贏得非常輕鬆，開波19分鐘，基斯甸艾歷臣開出角球，拉舒福特接應第一時間勁射入網。3分鐘後，拉舒福特又嚟料，左路橫傳畀安東尼馬迪爾射成2比0。
曼聯領隊坦哈格見勝局已定，下半場頻頻換人，畀加拿祖、雲迪碧克、費特等副選上陣。費特臨完場前接應卡斯米路傳送，射成3比0。兩位巴西國腳中場，英超首次為曼聯合作創造入球。
拉舒福特上季為曼聯上陣32場僅入5球，但今季踢21場已入10球同有4次助攻；未踢到半季，入波已經多過上季一倍。25歲仔，開始大熟大勇，改善埋比賽態度，足以成為曼聯鋒線新核心。
曼聯上次英超贏3球或以上，已經係今年5月初主場贏賓福特3比0，今仗再嘗大勝滋味，以紀錄向外界宣示：冇C朗咪仲好！
