曼聯同C朗解約後，急須搵鋒將代替，一直盛傳PSV燕豪芬嘅加普，係曼聯心目中嘅頭號人選，但隨住加普今季喺荷甲大放異彩，加上喺世界盃亦有水準演出，令其身價進一步上揚，唔少球會吼到實，想簽佢都肯定要使唔少錢。
不過，英國《鏡報》日前報導，目前排荷甲第三嘅燕豪芬，目前正陷入財困，會方要盡快賣主力籌錢，有價有市嘅加普，將會成為首位套現對象。
事實上，喺今夏嗰陣，曼聯領隊坦哈格，曾經同加普傾過加盟意向，雙方亦情投意合，不過曼聯同燕豪芬傾唔掂轉會費，最終曼聯買咗安東尼而棄加普。
走唔成之後，加普今季喺荷甲入9球、12次助攻，兩項數據都係聯賽第一，去到世界盃，加普更有3球進帳，頭槌、左右腳各入一球，相當全面。
由於曼聯同加普已經傾好晒，燕豪芬只要同曼聯斟掂轉會費，加普就可以成行，《鏡報》指燕豪芬為加快成事，願意只收取約5000萬鎊轉會費，如無意外，1月前就會有好消息公佈。
