今晚英超7點半早場又有曼聯，約埋成班fd子去食吓嘢睇波就最開心嘞。曼聯啱啱喺上場2比1搞掂利物浦，士氣總算回復返啲，今場作客修咸頓，可唔可以食住上？
曼聯頭兩輪輸晒，對手只係白禮頓同賓福特，仲要係絕望咁輸法，以為上場會畀利物浦大炒，點知主帥坦哈格棄用C朗同麥隊，成隊波即時唔同晒，用番艾蘭加呢啲新人，前面真係做到逼搶，今場加埋卡斯米路，中場攔截力同創造力，應該會比上一場更好。
修咸頓今季都幾爆，首輪領先下畀熱刺大炒，之後兩場聯賽都係先落後下追和及反勝，3場波加埋入5球失7球，場場開大，入得又失得。睇埋對賽往績，近年兩軍對決令人印象最深嘅，當然係修咸頓作客曼聯輸9比0，今場主戰曼聯，老實，勝負真係冇乜頭緒，想刺激啲睇波，就玩個入球大啦。
