今晚英超，輪到熱刺干地仇家杜曹登場，率車路士作客列斯聯。兩軍開季同樣1勝1和，不過論對手硬淨程度，當然係車仔水份較少，論戰力同往績，亦係車仔秤先，車仔讓一球，揀上盤。(開賽時間：周日晚9時)
先講講消息，車仔主帥杜曹上仗同干地衝突，杜曹最終被判罰款及停賽1場，不過今場仍可領軍，下場對李斯特城先停賽。
車仔季前經歷唔少變動，好彩幾位新兵史達寧、高列巴尼同古古列拿表現都OK，戰力計落係不及上季嘅，不過從首兩仗所見，車仔戰術偏向更沉穩，即使對手係愛華頓都唔會急於搶攻，上場失兩球畀熱刺，唔講爭議，好大程度係對手個別球員質素高所致。
至於列斯聯冇咗拉芬夏同奇雲菲臘斯，戰力大打折扣，開鑼戰2:1反勝狼隊，上場就2:2和修咸頓，雖然火力保持，但防線就好明顯有問題。睇埋往績，列斯聯上季下半季對「Big6」係全敗，今場怕且都凶多吉少。
