講惡死領隊，除咗馬體會施蒙尼，熱刺嘅干地亦係其中一個，外型夠兇悍，鬧人嗰陣上晒頭，好多大牌球星見到佢都怕怕。
但呢個世界，永遠一物治一物，強勢如干地，見到一個人，都唔敢同佢硬撼，乖乖哋聽話。邊個咁巴閉？迪亞高哥斯達！無論講樣衰同講惡，呢位茅王都好「出色」，仲有一位斯文靚仔親身認證。
轉眼已34歲嘅法比加斯，2014-19喺車路士搵食，2016-18同干地合作，法比仔對呢位鐵血教練有好深體會，因為佢曾經畀干地搞到冇晒自信，嚴重懷疑自己存在價值：「當干地2016年開始執教車路士，頭3個月我完全冇出場機會。佢清楚表明需要另一種類型嘅中場，嗰個唔係我，而係尼曼查馬迪。」
「但之後對曼城場波，當時車路士7連勝，賽前干地突然對我講：今場波你打正選。結果我哋踢得非常好，贏3:1。我表現好好，仲有一個助攻畀迪亞高哥斯達，幫球隊追和1:1。我當時仲以為已經扭轉干地對我嘅印象，點知下場對西布朗，馬迪傷癒又做番正選。去到70分鐘依然0:0。好明顯，呢個時候需要我呢種創造性球員出場，但干地一直冇反應。」
「我好記得，迪亞高哥斯達當時好勞氣，走向干地大聲爆粗：xx！快啲擺法比加斯入嚟啦！干地係一個冇人敢惹嘅領隊，但總有人可以尅住佢。當時干地扮聽唔到，兩分鐘後佢就埋嚟我度，叫我準備落場。結果我真係上陣，完場前仲送出助攻畀迪亞高哥斯達，攞足3分。」
其實迪亞高哥斯達同干地都幾夾，佢兩個喺2016/17攜手幫車仔拎聯賽冠軍，可惜2017年年頭，天津權健提出收購迪哥，仲願意開出世界第一高薪去搶人，但當時車仔爭緊冠軍，所以一口拒絕，迪哥相當不滿，之後就怪行連連，干地當時為咗爭冠，忍佢，但一完季後即時做嘢，用短訊通知迪哥，話新季冇預佢，擾攘一大輪後，迪哥喺開季後如願重返馬體會。
