連加特確定加盟升班馬諾定咸森林，連同借用曼聯門將甸恩軒達臣等其餘10個新球員，森林已花費7000萬鎊，擺明唔甘心做升降機，但要成功護級
甚至更進一步，唔單止睇球員，更要大神庇佑？
今時今日，小球會要創造奇跡係極度十分困難，百幾年前森林曾經做到過，而且過程玄幻至極，比李斯特斯贏英超，神奇得多。
穿越返1862年，英國諾定咸市成立歷史上第一間職業足球會，3年後再有森林。作為先驅之一，森林一直為足球發展盡力，幫助其他熱愛足球人士成立球會。1886年，一班北倫敦工人成立戴爾廣場FC，森林送上大批自家傳統紅色波衫，結果紅色被該隊沿用至今，冇錯，亦即係阿仙奴。
轉眼近百年，英國足球茁壯成人，森林為公盡力，自己卻仍浮浮沉沉，直至1975年，聘用白賴仁哥洛夫做領隊，玄幻故事出現第一個高潮。
如果講性格領隊，哥洛夫猛過費格遜好多，根本已到暴戾兼傲慢級別。堅尼出道初期，曾經跟過哥洛夫，一次回傳失誤導致失波，賽後畀領隊幾乎兜拳打暈，但堅尼完全冇投訴，因為佢對哥洛夫，佩服至五體投地。
哥洛夫剛，助教泰萊柔，產生奇妙化學作用，招攬鋼門施路頓、第一個英格蘭黑人國腳韋夫安德遜、技術流中場杜利華法蘭斯等高質球員，78年以升班馬身份，奪得當時最高級別嘅英格蘭甲組冠軍，呢個已經係難能可貴，更神奇嘅係接住喺79及80年，先後擊敗馬模、漢堡，成為歐洲冠軍。由77至80年，大大小小冠軍共8個，曾經42場不敗，紀錄要到21世紀先至被阿仙奴打破。
但哥洛夫自從同泰萊反面，指責最忠實戰友係叛徒後，無心戀戰，1993年辭職，森林亦進入黑暗期，升升降降，及至1999年降班後不復返，更曾淪落至第三級別，歐洲冠軍如斯折墮，教人唏噓。
2017年，希臘航運大亨馬里納基斯入主，揚言5年內回升頂級聯賽，結果真係及時達標。過程亦極神奇，上季初，頭7場只得1分，換前史雲斯主帥史提夫古柏救亡，之後戰績火速冒升，更藉附加賽升上英超，中間已相隔25年。
古柏話附加賽決賽前向球員打氣，要佢哋記住哥洛夫所代表嘅森林歷史及精神，爭取最後勝利。哥洛夫2004年因胃癌逝世，但經過諾定咸街頭，仍會見到呢位偉大領隊嘅銅像，見證足球古城興衰。
8月6號，森林作客紐卡素，重返頂級聯賽第一擊，連皇披上紅色戰衣，會唔會係另一玄幻篇章起點？時移勢易，職業足球生態同40年前相比，已係另一世界，細會奇跡極難複製。但無論如何，擁有輝煌足球歷史嘅森林，肯定係近年最值得注視升班馬。
