車路士同熱刺尋晚激和2:2，可以話係開季以嚟最好睇、最有血性嘅賽事，兩位領隊杜曹同干地，更上演一幕《流氓師表》之握手風雲，幾乎開拖咁滯，事後二人齊齊食紅牌，打～和，Super！
今場波入球梅花間竹，車路士兩度領先，熱刺兩度追和，而熱刺入嗰兩球都有啲爭議，入第一球後，干地仲走去杜曹面前慶祝，引爆二人衝突、幾乎講手，結果齊齊領黃，掀起《握手風雲》序幕。
隨住卡尼絕殺、2:2完場，賽後先係真正戲肉，干地同杜曹握手，點知杜曹因為干地冇望住佢而嬲嬲豬，握實干地唔放，搞到干地火都嚟，再一次引爆衝突，如果唔係雙方職球員拉開大家，隨時大打出手。完場後二人齊齊食紅牌，又係打~和！
杜曹事後受訪，怒插球證安東尼泰萊：「熱刺兩球都唔應該成立！第一球，夏維斯被侵犯在先；第二球，古古列拿被扯頭髮！今場只有一隊值得贏波，乜依家踢波可以扯頭髮嘅咩？呢場係一場精彩嘅球賽，但球證判決實在太出色，VAR又冇表示先神奇……泰萊唔應該再執法車路士嘅比賽！」今場波嘅VAR球證則為「名哨」甸恩。賽後記招，杜曹都好搞笑咁展示吓自己手瓜，暗示唔怕同人開拖。
至於干地，賽後就話佢同杜曹冇芥蒂，呢啲只係小問題，但幾粒鐘後就喺社交網出po，話如果知道杜曹曾經跑過嚟慶祝，一定會出腳kick低佢！兩位名帥堅爆趣，絕對令呢場波生色不少。
