美國老細保利燒錢停不了，對水晶宮前截咗阿仙奴胡、從薩克達簽入22歲嘅烏克蘭翼鋒梅迪克，已經喺史丹福橋同球迷Say個Hi，不過《football.London》指，保利仲未夠皮，諗住再截劫阿仙奴另一心頭好！
梅迪克合約總值高達1億歐元（約港幣8億4000萬），相當誇張，不過保利有嘅係錢同埋好多錢，佢打算繼續開水喉，名單上除咗一直傳緊嘅PSV小將馬杜基、慕遜加柏前鋒馬古斯杜林，仲有華拉度列右閘費斯尼達，而呢位18歲西班牙小將，亦係阿仙奴打算出手嘅目標之一。
冬窗重開後，車路士已經用咗1.7億歐元買人，嚟緊仲陸續有來，老細不停科水，領隊樸達都要識做先得，尋晚佢哋終於贏番場，主場1:0險勝水晶宮，得到近10場聯賽第2場勝仗。
車路士成績差、傷兵多，仲要黑仔，上仗對富咸，前鋒借將祖奧菲歷斯首度登場，表現係幾好，但下半場因危險動作被逐，球隊最終輸埋，佢亦要停賽。前線只有繼續用夏維斯，而且今場一定要主攻，美臣蒙特、薛耶治推埋上去最前線。
新翼未出得，但有另一新面孔為車路士首度登場，21歲中堅巴迪亞舒尼，之前効力法甲摩納哥，轉會費3800萬歐元，今仗同老大哥堤亞高施華合作扼守中路。
水晶宮上半場表現唔錯，特別7號仔米高奧利斯，製造好多威脅，但車仔門將阿列沙巴拿加真係有料到，起碼救出3個危險攻門。
奧巴美揚下半場得到上陣機會，知恥近乎勇，表現較之前好，64分鐘，夏維斯接應薛耶治傳中，頭槌頂成1:0。
水晶宮之後全力反撲，最有威脅係杜哥利勁射，又畀阿列沙巴拿加精彩撲出，車仔全取3分，Kepa真係最大功臣。
車路士贏波後，同利物浦同得28分，列第9同10位，兩隊嚟緊年三十晚早場會碰頭，睇睇梅迪克會唔會為車仔首度上陣先！
