【英超】Friend番!利記贏4:2 沙拿破紀錄 高普公開激讚;熱刺近20年最曳 驚爆內訌

利物浦好返,又到熱刺!上個禮拜利物浦失分,高普沙拿罕有口角,好在佢哋已經冰釋前嫌,尋晚主場以4:2擊退熱刺,反之聯賽4連敗嘅熱刺,輸到發忟憎,艾馬遜喺半場同羅美路火爆對峙,要隊友幫手拉開先平息風波。

英超嚟到最後直路,又嚟個讓4大賽,原先排第4嘅阿士東維拉喺早場0:1不敵白禮頓,第5嘅熱刺緊隨其後,作客利物浦輸2:4,踢少1場落後維拉7分,爭歐聯資格嘅機會越嚟越細。同時,熱刺喺聯賽4連敗,亦係球隊自2004年後,首嘗聯賽4連敗滋味,寫下近20年最差紀錄。

熱刺主帥普斯迪高路,賽後死撐話球員心態冇問題:「佢哋鬧交係因為佢哋在乎,唔滿意球隊現況,有建設性,呢個係好事嚟。」不過佢亦暗示,要踢出佢心目中嘅足球,夏天需要換血。

至於贏波嘅利物浦,正選嘅沙拿有入波又有助攻,今季英超入18球同10次助攻,成為英超史上首位連續3季「雙十」球員,追平朗尼錄得5季「雙雙」嘅紀錄。高普賽後亦大讚愛將,公開主動破冰:「沙拿表現非常好,冇得彈、好神奇,佢同艾利洛喺右路好有威脅,我戥佢開心。」

沙拿今場意外地重獲正選,同加普及迪亞斯組成進攻三叉戟,16分鐘,加普左路傳過頭波去遠柱,沙拿飛將軍式頭槌建功。熱刺落後下表現冇乜起色,上半場完結前再失波,羅拔臣殺入禁區,妙傳畀沙拿起腳,域卡利奧撲出,這羅拔臣補中,紅軍將紀錄擴大至2:0。

換邊後,利物浦繼續攻,50分鐘,加普接應艾利洛傳波頂成3:0;59分鐘,艾利洛個人表演,先避過賓坦古亞,再起左腳轟入世界波,4:0。熱刺其後由李察利臣追番粒,呢位巴西國腳及後又做助攻,孫興慜射成2:4。兩隊之後都有錯失機會,最終利物浦贏4:2完場。