9月1日香港打10號波、吹到七國咁亂，喺歐洲主流聯賽，Deadline day同樣係極多Deal、七國咁亂，不過講到當中最多人撐嘅，應該係格連活特外借到西甲基達菲。
格連活特於2022年初，因涉嫌毆打及強姦女友而被捕，雖然本年2月獲撤銷指控，而綠木亦已與女友和好，仲做埋爸爸，不過礙於贊助商同女子隊嘅聲音關係，曼聯繼續進行內部調查，並下令格連活特停賽直至完成調查為止。
事實上，喺內部調查進行期間，曼聯主帥坦哈格以及大部份隊友都打晒開口牌，希望球會支持格連活特，將佢解凍，但礙於贊助商、輿論及曼聯女足嘅壓力及反對，最終綠木冇得留低。
早前雙方亦發表聲明宣佈分手，當中格連活特指為免令球會添上麻煩，所以決定「最後的疼愛是手放開」，除咗令曼迷感到可惜，就連唔少中立球迷，亦希望綠木盡快離隊重生。
由於英超壓力已容不下佢，所以早前曾傳出佢會轉戰意甲，不過羅馬、阿特蘭大已否認對格連活特感興趣，就連傳過有興嘅沙特阿拉伯球會伊蒂法克，都即刻劃清界線，令唔少球迷都覺得，綠木極有可能邊度都去唔成。
好彩，喺死線日，終於有西甲球會出手、提出外借一年，雖然基達菲規模較細，但今季佢哋成績都唔差，開咧戰悶和巴塞，到上仗就開齋擊敗阿拉維斯，如今有埋格連活特，相信會方亦唔介意佢嘅過去，希望佢幫手護級，由於下星期係國際賽賽期，預計格連活特最快會喺9月17日晚亮相鬥奧沙辛拿。
完成交易後，曼聯亦發表聲明，希望格連活特重建事業，並會支持佢同埋佢嘅屋企人，或者過多一年冷河後，到時再睇吓輿論，決定會否再重新起用綠木。
