【英超】87秒即落後!狂攻下2:1反勝白禮頓;無敵晏菲路 利物浦再做逆轉王

利迷再一次飽食驚風散!周日英超,紅軍主場對白禮頓,開波唔夠兩分鐘就落後,幸最終由路易斯戴亞斯、沙拿入波,反勝2:1。

打完今場,利物浦29戰67分,阿仙奴28戰64分,曼城28戰63分。阿仙奴、曼城同日稍後時間比賽,利物浦梗係最想佢哋和波喇!

毫無疑問,利物浦係今季英超「逆轉之王」,未對白禮頓前,紅軍喺落後情況下拎到23分,全英超最多,但點解餐餐都要嚇親粉絲?

今場開波只有87秒,白禮頓前鋒韋碧克入禁區即抽射破網。根據統計,呢球係自2019年10月後,客隊喺晏菲路最快取得1:0領先嘅比賽,上一次熱刺領先1:0時,哈利卡尼41秒即入波。

落後下利物浦全面反撲,沙拿上半場唔順Q,幾次射門都搞唔掂,有球蘇保斯拉爾傳到妙極,但法老王面對龍門甩拖,白禮特門將巴特多謝都慳番。

27分鐘,利物浦終於把握白禮頓後衛解圍失誤,由路易斯戴亞斯近門射成1:1。65分鐘,阿歷斯麥卡里士打完美直傳,又係交畀禁區內嘅沙拿,今次佢冇失拖,射成2:1。

之後紅軍繼續狂攻,沙拿斜傳路易斯戴亞斯射入,但後者又係腳毛式越位,非常唔抵。攻極未有3:1,紅軍躉又再心掛掛,特別86分鐘睇見前利物浦中場拉爾拉拿,後備上陣冇耐施展妙射,只係僅僅柱邊出界,幾乎收死舊東家,真係嚇到彈起。

驚足96分鐘,利物浦終於險勝2:1,晏菲路連續32場不敗,跟住睇一陣曼城對阿仙奴賽果。仲有9場波,周五凌晨快車主場對錫菲聯,過關應冇問題,跟住周日晚10點半作客曼聯,又係必睇大戰!