雙紅會永遠都係咁好睇，你又點估到氣勢如虹嘅曼聯，作客會以0比7慘負利物浦？紅軍加普、沙拿、達雲紐尼斯各入兩球，新三叉戟組合終於踢出代表作，法明奴亦喺個人最後一次雙紅會入波，感動一眾利物浦球迷。
曼聯剛奪聯賽盃，之前又接連反勝巴塞隆拿、韋斯咸，賽前唔少人估計，曼聯可以喺晏菲路球場，向宿敵顯示真正強者回歸，估唔到嚟個反高潮，今場竟然係一場歷史性大屠殺，創下曼聯對利物浦最大輸波差距，領隊坦哈格正帶領球隊再建王朝之時，突然遭遇恥辱性大敗，實在令人意外。
雙方都出盡最佳陣容，曼聯上半場藉中堅利辛度馬天尼斯死拚，阻擋利物浦唔少攻勢，但到43分鐘終於失守。羅拔臣手術刀式直傳，加普控球後由左路突入禁區，快射遠柱入網。
戰至下半場，曼聯已經散散哋，特別中後場冇力兼亂籠，撞正利物浦三叉㦸打出水準，半場內狂失6球……達雲紐尼斯47分鐘頭槌建功，展開大屠殺序幕。3分鐘後，藉曼聯全軍搶攻，沙拿左路施展速度同腳法，將利辛度馬天尼斯玩到瞓地，再傳交加普於極窄角度射成3比0。
加普於冬季轉會窗亦係曼聯獵物，佢最後選擇加盟紅軍，之前一直表現欠佳，唔少曼聯迷話好在冇買水貨，喪串呢位荷蘭國腳，而加普今仗則入兩個靚波嚟回敬，非常爭氣。
而沙拿亦終於法老王再上身，除精彩助攻外，66分鐘射成4:0。曼聯球員到此完全迷失，不知所措，基本上已中門大開，畀達雲紐尼斯於75分鐘成功梅開二度。
法明奴踢埋今季離隊，呢位功勛前鋒79分鐘後備上陣，享受最後一次雙紅會。佢喺83分鐘助攻，令沙拿梅開二度，呢對最佳拍檔為利物浦奪奬無數，以下入球更足以留念，藉沙拿傳送，法明奴完成大勝曼聯7:0嘅歷史時刻。而沙拿亦憑兩個入球，合轟129球，成為利物浦英超史上入波最多嘅神鋒。
利物浦近期聯賽4勝1和，已趕過紐卡素，升上第5位，全力爭奪來屆歐聯入場券。至於今屆歐聯16強次回合，利物浦將於下周中作客皇家馬德里，紅軍有冇機會收復落後2比5劣勢，創造更難以置信奇跡？
