【英超】632場!占士米拿追平傑斯 登英超出場王第2位!差21場破紀錄 邊個第一咁勁揪?

白禮頓周二凌晨作客韋斯咸,雖然佔盡優勢下只能賽和0:0,但老將占士米拿踢咗佢第632場英超,同曼聯名宿傑斯睇齊,並列歷史第2位。

現年37歲嘅37占士米拿,出身於列斯聯青訓,2002年11月10日,以16歲之齡對韋斯咸,踢出英超處子戰。

之後占士米拿先後效力紐卡素、維拉、曼城、利物浦,拎盡一切錦標後,舊年加盟白禮頓。佢當初同白禮頓簽約1年,預計雙方會再續約1年,到下季初,占士米拿應該可以打破英超出場王巴利嘅紀錄(652場),雙方目前有21場差距。稍有波齡嘅球迷,都對全能中場巴利有印象,佢同樣踢過維拉、曼城,之後轉投愛華頓,3年前喺西布朗退役。

真正通天老倌,占士米拿賽後話:「只有門將呢個位係我未踢過,暫時亦冇人想我去做龍,但如果比賽得番幾分鐘而門將受傷,我都樂意把守最後一關。」

白禮頓今場表現好好,和波係有啲唔抵,控球指數接近7成,埋門次數高達22次,但就係入唔到波,領隊迪薩比賽後話:「我為球隊嘅表現感到高興,雖然冇入波,但值得贏波。我哋踢咗一場食腦嘅比賽,因為韋斯咸強在反擊,而我哋集中作賽,冇畀對手任何機會。」

提到占士米拿榮升英超出場榜第2位,迪薩比話:「佢對我哋嘅作用好大,白禮頓為擁有佢而自豪!37歲,體能仍然可以應付90分鐘比賽,白禮頓的確需要佢。」