【英超】6:0!阿仙奴創作客贏波紀錄;迪勤懷斯倒戈入波 同韋斯咸擁躉仍有深厚感情

阿仙奴贏完利物浦更加醒神,年初二英超向韋斯咸狂派6蛋後,領隊阿迪達高興到暈,大讚球員創造咗球會歷史上英超作客最大勝仗。

今場開波前,阿仙奴英超最大作客勝仗,分別係2009/10球季對愛華頓,以及1998/99球季對米杜士堡,兩場都贏6:1,今場贏6:0刷新咗數據。

更令阿迪達開心嘅係,共有5名球員包辦呢6個入球。一對中堅沙列巴、加比爾,加上薩卡、托沙上半場各入一球,下半薩卡再入一粒,倒戈中場迪勤懷斯亦有士哥,湊成6:0大勝:「真係非常好,證明每個人都有入球決心,能夠喺禁區內帶嚟貢獻。」

阿迪達難掩興奮心情:「我哋以呢種表現同踢波方式,喺一個非常困難嘅地方得到咁多入球,充份說明呢班球員今日踢得有幾好。創造球會歷史實在太好,我哋正身處一個美好嘅時刻。」

返回前球會倒戈「埋齋」嘅迪勤懷斯,入波後拒絕慶祝,以示對前球會尊重,阿迪達補充:「返到呢度比賽,對佢嚟講係好困難。韋斯咸球迷對佢好好,當佢去開角球嗰陣,有人為佢鼓掌。懷斯非常喜歡呢間球會,所以我知道,今場比賽對佢意義好重大。」

目前英超榜首三雄,利物浦24戰54分,曼城23戰52分,阿仙奴24戰52分,真係好睇過戲。