【英超】4:1!紐卡素聯賽主場5連勝!車仔兩場失8球 施華送大禮 肥普:好嬲、好嬲、好嬲!

雖然周中歐聯生死戰要對巴黎聖日耳門,傷兵成籮嘅紐卡素依然毫不慳力,周六英超主場4:1大破車路士,實現主場5連勝。

雖然之前兩仗分別挫熱刺及賽和曼城,令人覺得車路士稍有起色,但今仗車仔又發揮欠佳,抵擋唔住紐卡素主場強大攻擊力,開波13分鐘,已被阿歷山大伊沙克攻破大門。

伊沙克揭開大勝序幕。

雖然史達寧喺23分鐘,直接射入自由球扳平,但拿修斯60分鐘建功,令紐卡素再度領先。車路士老牌中堅堤亞高施華,61分鐘出現低級失誤,祖連頓收大禮射成3:1。車路士右閘列斯占士,73分鐘兩黃一紅被逐出場,打少個更加冇得追,紐卡素由哥頓射成4:1完場。

因為兼顧歐聯,紐卡素今季聯賽表現,未如上季硬淨,但面對強隊即發揮小宇宙,之前英超贏過阿仙奴,英聯盃接連淘汰曼市雙雄。上季由愛華頓轉會嘅年輕前鋒安東尼哥頓,表現越來越好,今仗交出一入球一助攻,英格蘭國家隊領隊修夫基,真係要諗諗佢。

連埋上場4:4激和曼城,車路士近兩仗共失8球,防線穿大窿,老將堤亞高施華疲態畢露,係時候抖抖。2023年就快終結,藍戰士今年已輸咗16場,僅次於19場嘅般尼茅夫。

普捷天奴賽後話,呢場波係今季表現最曳嘅比賽:「呢場波令我好嬲、好嬲、好嬲!我哋冇可能踢啲咁嘅波,完全展示唔到爭勝決心、正確能量!老實講,紐卡素唔算踢得非常好,但竟然贏得咁輕鬆,呢場係今季踢得最差嘅比賽!」