【英超】34次射門 雙紅會仍悶和 場外花生更好食!VVD高普堅尼 大打口水戰

尋晚英超雙紅會,上季狂炒曼聯7蛋嘅利物浦,今場狂攻不果,最終只能同紅魔踢成0:0,紅軍榜首地位,被同日獲勝嘅阿仙奴取代。領隊高普、隊長VVD先後發炮寸曼聯,惹嚟紅魔名宿堅尼還擊,場外花生絕不遜色於場內比賽。

利物浦中場麥卡里士打、左閘羅拔臣倦勤,由日本遠藤航正選,前面沙拿、達雲紐尼斯及路爾斯迪亞斯攻堅;曼聯勁多主力打柴,隊長般奴費蘭迪斯停賽,麥佳亞養傷,中堅由華拉尼搭伊雲斯,明奈取代般奴,同麥湯文尼、安拉拔喺中場拍住上。

利物浦甫開賽就壓住曼聯狂攻,上半場紅軍控球率近7成,角球9對0,射門15次,最近磅係28分鐘,利物浦角球攻勢,雲迪克頭槌,奧拿拿飛身撲出底線。換邊後利物浦繼續猛攻,可惜撕破唔到紅魔防線,去到補時階段,曼聯達洛治投訴過激,連食兩張黃牌被逐,但對戰果冇影響,0比0完場。

利物浦全場34次射門,但都係咬唔入曼聯,痛失兩分後,目前與維拉同樣17戰38分,落後榜首阿仙奴1分。同時,紅軍喺雙紅會前,今季各項賽事主場10戰全勝,嚟到尋晚終於斷纜。

高普賽後話:「佢哋(利物浦球員)嘅表現我好欣賞,但最唔喜歡嘅就係賽果,每個人都見到我哋好想贏,我唔記得之前對曼聯,係咪好似今場咁統治比賽,印象中就算上季贏7:0,都冇好似今場咁一面倒,而今場只係0:0。」

至於隊長雲迪積克,賽後就直言好沮喪:「你哋睇呢場比賽嗰陣都feel到,利物浦掌握大部份控球權、努力創造入波機會,根本得一支球隊想贏波。但有時我哋處理得太草率,冇去提升入球機會……舊年我哋贏曼聯7:0,但其實比賽感覺一般,不過呢啲嘢已唔重要了。」

VVD嘅言論,辣著喺直播室嘅前曼聯隊長堅尼,話雲迪積克太過傲慢,反寸VVD喺發表偉論前,應該要記得紅軍30年嚟,只係贏得一次聯賽冠軍。