【英超】3:1反勝愛華頓 曼城重返前4!夏蘭特最快下月復出 科頓靚仔數據頂得住

尋晚英超賽事,曼城拎完世冠盃、成為五冠王後即時發威,作客以3:1反勝愛華頓,重返聯賽前4位置。哥迪奧拿賽後話,夏蘭特暫時仍未有確實嘅復出日期,令唔少曼城球迷相當擔心。

冇夏蘭特、冇杜古、冇迪布尼,曼城唯有繼續用「蜘蛛仔」祖利安艾華利斯掛帥,配合貝拿度施華、基亞利殊同科頓攻堅,效果當然冇咁好,上半場29分鐘,就係貝拿度喺中場犯錯,洛迪又控甩腳,被麥尼爾拎到個波再傳中,結果被積夏利遜射入,愛華頓爆冷先開紀錄。

曼城下半場終於瞓醒,53分鐘,科頓遠程炮得手,追和1:1。曼城之後㩒住嚟揪,64分鐘,科頓開角球造成混亂,愛華頓阿馬度奧拿拿手球被判罰12碼,艾華利斯主射搞掂,曼城反勝2:1。完場前輪到碧福特犯錯,貝拿度施華把握機會,最終曼城贏3:1。

曼城贏波後,以18戰37分力壓熱刺,重返前4位置,踢少1場下落後榜首利物浦5分。至於被扣10分後越戰越勇嘅愛華頓,近兩場先後輸畀熱刺同曼城,仍然以19戰16分排第17。

吹起反勝號角嘅科頓,今場7次射門、兩次中目標入1球,4次突破3次成功,同時仲有3次關鍵傳球、1次成功長傳和1次成功傳中,7次對抗贏5次,傳球成功率高達94%。

曼城雖然重返前4,但傷兵問題的確令人擔心,哥迪奧拿賽後被問到夏蘭特幾時回歸同傷兵問題,佢咁答:「依家佢仲係自己操練,而迪布尼就已經同大軍一齊操,夏蘭特幾時先跟大隊,就要取決於佢幾時先唔痛。」

咁夏蘭特幾時復出?哥帥就話未有確實日期:「我希望佢喺1月可以復出啦,但最終日子都係要由醫生決定。」