好癲！阿仙奴喺周六英超尾場出戰，作客以3比0輕取升班馬般尼茅夫，開季3戰全勝，強勢登上榜首！球隊對上一次開季3連勝，已經要數到04/05球季，無論從表現定數據，似乎正預視阿仙奴今季將有一番大作為。
呢場波阿仙奴一眾球員臂纏黑紗，悼念因病逝世嘅58歲首席場地管理員Steve Braddock。今場阿迪達繼續玩動態陣式，右閘賓韋特有時移入中路幫波，而辛真高就好多時會喺中場附近派牌，喺4231同343之間不停轉換，令對手無所適從。
開波初段，阿仙奴狂風掃落葉式進攻，5分鐘就有斬獲，「耶穌仔」接應傳波，控定後單騎闖關、帶番生個波後一個靚直線，馬天尼利起腳被門將擋出，隊長奧迪加特一聲多謝，執雞搞掂。阿仙奴開紀錄後繼續㩒住砌，11分鐘，賓韋特右路傳送，加比爾捷西斯控橫後，奧迪加特順勢狂抽，阿仙奴贏到2比0。
之後阿仙奴開始回氣，猜傳為主保留體力，門將藍斯度應該悶到抽筋，事關般尼茅夫掂波機會少之又少，上半場完，阿仙奴控球率超過7成，而般茅係1次射門都冇。
換邊後，般茅少帥柏加加辣，安東尼同曲克落場，隊波醒神好多，起碼有番啲攻勢，可惜冇幾耐就一盤冷水照頭淋，阿仙奴死球，格列沙加左路接應後傳番個地波出嚟，沙列巴順勢燙射，超靚波死角入網，3比0。
「耶穌仔」成場波都好活躍，亦勤於回防，但就係搵唔到士哥，72分鐘，佢一次半單刀憑極冷靜嘅處理方法，送咗個波入網，可惜被判越位在先，最終阿仙奴維持3比0勝果，開季3戰全勝，暫列榜首，下場將回師主場迎戰另一升班馬富咸，挑戰4連勝。
