周日英超，利物浦落後之下，28分鐘更打少個，但仍然創造反勝奇跡，藉補時入波，作客2:1挫紐卡素。達雲紐尼斯下半場後備入替，包辦兩個入波，仲要射得幾靚、盡顯把握力，由敗家仔搖身一變成為英雄。
利物浦欠缺有實力嘅防守中場，買唔到摩西斯卡些度後，轉而羅致遠藤航，日本國腳今仗擔任正選，同阿歴斯麥卡里士打、蘇保斯拉爾合組中場線。
紐卡素中場質素其實更高，辛度東拿利、般奴古馬雷斯、祖連頓，計攻守平均能力，比紅軍有過之而無不及。
中場截擊力已成疑，連後防都發夢，仲有邊個？又係阿歷山大阿諾特，沙拿25分鐘中場回傳，阿諾喺毫無壓力下竟然漏踢，回身追速度又慢，被安東尼哥頓長驅直進，單刀射成1:0。
紅軍落後唔知死，中後場依然鬆散，失波後只有3分鐘，安東尼哥頓一個直線，又劏開利物浦防線，阿歷山大伊沙克呈單刀之勢，雲迪積克情急之下，禁區邊將佢踢跌，被球證直接出示紅牌，驅逐出場。
打少個之下，高普決定打少個前鋒，以祖高美斯入替戴亞斯，雖然被紐卡素圍攻，艾利臣比加撲出米基爾阿米朗勁射後再中柱，但總算保住不失，只落後1球完半場。
雖然以眾凌寡，但喺利物浦沉著應戰、縮後防守下，紐卡素下半場未有太多威脅埋門，咬極唔入，最有威脅係米基爾阿米朗帶幾十碼後射中柱。
高普當然唔會坐以待斃，見對手攻勢唔算狠，就先後換入迪亞高祖達、達雲紐尼斯，企圖以突擊扳平，果然，喺80分鐘畀佢搏到入球出現。紐卡素中堅保治文出現失誤，達雲紐尼斯做好戲，半單刀勁射遠柱入網，追和1:1。
紐卡素心急想贏，但越急越唔順，反而後防露出大量空位，奇跡93分鐘出現，沙拿直線送前，達雲紐尼斯喺入第一球相近位置，右路射遠柱死角入網，大半場打少個劣勢下，2:1反勝完場。
紐卡素未能取得第2球，種下輸波惡果，米基爾阿米朗兩次射中柱，亦欠運氣；繼對曼城後再輸畀另一爭標對手，開季1勝2負，下輪作客白禮頓。利物浦2勝1和，下仗主場對維拉。
