【英超】2:1挫森林 阿仙奴兩連勝;達Sir不滿防線表現 揚言執正 強勢迎戰利物浦!

抖完一輪後,阿仙奴全面復活,繼上場5蛋狂炒水晶宮後,今晨再以2:1作客險勝諾定咸森林,得以升上第2位,踢多1場情況下,落後利物浦2分,不過賽後達Sir明顯對防線表現不滿,希望執到正一正,嚟緊周末大戰利物浦!

阿仙奴今場正選用馬天尼利、薩卡仔及加比爾捷西斯攻堅,中場線就有迪勤懷斯、路維仔及和奧迪加特,夏維斯先列後備。森林由基斯活特掛帥,強力中鋒阿旺尼就坐喺後備席。

阿仙奴佔盡上風,不過把握力實在唔掂,半場只係0:0,下半場阿仙奴加強攻力,66分鐘終於打破缺口,加比爾捷西斯沉底,再喺極窄角度下抽射破網。6分鐘後,阿仙奴反擊,由薩卡完成最後任務,領先2:0。完場前阿旺尼憑身體質素食贏身位,幫森林破蛋追成1:2完場。

賽後阿仙奴得46分升次席,落後踢少場嘅一哥利物浦兩分,而紅軍今晚就會大戰車路士,之後就會作客阿仙奴,合演超級榜首大戰。

賽後阿仙奴領隊阿迪達,就話勝利得來不易:「我見過好多球隊嚟到森林主場,都係吃盡苦頭,依家我哋贏咗,我為球員自豪!」

不過,達Sir亦認為防守方面仲有改善空間:「我哋失嗰球波真係喺水準以下,老實講,我係有啲失望,因為我原本諗住可以保持清白之身……我哋要掌握番節奏,因為嚟緊有一場榜首大戰,必須準備妥當。」

同晚英超仲有超冷門賽果,盧頓憑艾迪巴奧大演帽子戲法,主場4:0大破白禮頓,21戰得19分升上第17位,暫時逃離降班區。

艾迪巴奧大演帽子戲法。