【英超】2023壓軸戰又輸 阿仙奴崩盤?達Sir:今季最差一仗;熱刺後追 2024爭標超激!

2023年最後兩場英超,阿仙奴繼續頹,作客1:2負富咸;熱刺繼續勇銳,孫興民、李察利臣又有波入,主場3:1輕取般尼茅夫。踏入2024,爭標形勢更緊湊。

前列5強咬得激烈,新一年無疑會更刺激,榜首利物浦19戰42分、維拉20戰42分、曼城19戰40分、阿仙奴20戰40分;熱刺近5戰4勝1負,亦全力追上,20戰39分排第5,大家相差只係喺3分之內。

不敵富咸之後,領隊阿迪達形容阿仙奴踢出今季最差一仗,攻守都唔掂,絕對抵輸,如果唔盡快改善,今季唔駛諗爭冠軍。佢哋近3仗1和2負,如果對利物浦唔係有運,早已錄3連敗,令唔少球迷擔心,阿仙奴會再出現崩盤現象。

布卡約沙卡開波5分鐘建功,但之後畀富咸狂攻,魯爾占美尼斯29分鐘扳平,卜比列特59分鐘為富咸奠定勝局。

孫興民本月稍後時間,要代表南韓踢亞洲盃,未去之前全力搶分。柏比沙亞9分鐘開紀錄後,老孫上半場曾錯失兩個入波機會,但71分鐘閃電半單刀射成2:0,亞洲天王又入一個靚波。李察利臣80分鐘取得個人近5仗第5個士哥,助熱刺全取3分。

李察利臣同孫仔都好弗。

12球5助攻,孫興民弗到漏油,聯賽入球數已追和沙拿,只差榜首艾寧夏蘭特兩球。亞洲天王要為國出征,對熱刺當然極大打擊,好在占士麥迪臣1月中復出,屆時拍住李察利臣,希望將影響減至最低。