【英超】2:0贏白禮頓 曼聯60分、第8衝線;坦克:兩年前58分排第6、英超競爭好激烈!

曼聯無緣歐戰?尋晚英超煞科,曼聯作客以2:0擊敗白禮頓,呢次係紅魔兩個月嚟首次連勝,避免英超隊史最低分紀錄,總算為失敗嘅一季寫下較為好少少嘅結局。

雖然贏波,但曼聯仍然難逃排第8嘅結局,除非佢哋能夠喺足總盃爆冷擊敗曼城,否則將無緣任何歐戰。今季排第8,係曼聯自1990年以嚟嘅最差成績,淨勝球為「-1」,同1989/90賽季一樣。

今場大家都排出強陣,雖然白禮頓冇嘢好爭,但係今仗係領隊迪薩比同老牌中場拉爾拉拿嘅告別戰,迪薩比喺賽前宣佈提前解約,幾間豪門吼到實,據報祖雲達斯、巴塞隆拿都係呢位意大利籍主帥嘅下一站目標。

上半場白禮頓攻勢較多,60%的控球率、10次射門,但奧拿拿同利辛度馬天尼斯屢次救險,換邊後輪到卡斯米路發功,佢先救空門,之後再整個靚長傳,海倫Hold一Hold再交畀達洛治破網,曼聯劣勢下先開紀錄,完場前海倫錦上添花,曼聯贏2:0完場。

坦哈格賽後記錯咗,佢以為以般奴做前鋒嘅假9陣有波入,但其實兩球都係海倫後備落場後先搞掂:「兩個入球都好精彩,我認為自己遇到幸福嘅煩惱,因為兩個陣都取得成功。海倫係一個好好嘅球員,而且我要强調,喺一場艱苦嘅決賽入面,唔單止需要11名正選,仲需要板凳球員。」

講到今季總結,坦克話:「我哋知道表現唔夠好,呢度係曼聯,必須獲得更好成績……競爭真係好激烈,我哋有60分,排第8;兩年前係58分,排第6……」