世界盃前最後一輪英超高潮迭起，阿仙奴喺尾輪登場，作客未有正式主帥嘅狼隊，憑大佬奧迪加特梅開二度，以2:0勝出，並藉曼城爆大冷輸畀賓福特，目前阿仙奴已拋甩5分，做住冬季冠軍、開心過聖誕！
阿仙奴最強陣容出擊，加比爾捷西斯正箭頭，奧迪加特、馬天尼利、薩卡仔支援，雙中場柏迪、沙加，左右二閘辛真高、賓韋特，中堅馬加希斯、威廉沙列巴，蘭斯道爾把守最後一關，呢場賽後有8人就要飛去卡塔爾踢世界盃，而另外3位冇份嘅奧迪加特、辛真高同馬加希斯，當中有2位亦係國家隊必然正選，可想而知阿仙奴個陣有幾堅，根本唔係虛火。
有辣有唔辣，咁多國腳要踢世界盃，會唔會錫身㗎？阿仙奴眾將話畀大家知，絕對冇。狼隊上半場好氣好力，排出密集防守陣式，而且攔截硬淨，頂得住有餘，格列沙加踢咗16分鐘就被調離陣，由法比奧韋拉入替，半場兩軍悶和0:0。
換邊後開始入肉，狼隊攻勢往往欠缺臨門一腳，反而呢方面阿仙奴就完勝，55分鐘，隊長奧迪加特接應法比奧韋拉傳中建功，75分鐘，再喺亂軍中起腳搞掂，幫阿仙奴鎖定2:0勝局。
聯賽14戰12勝、以5分優勢壓住曼城，相信季前肯定冇人估到。但事實擺在眼前，喺阿迪達嘅「動態中場」戰術下，阿仙奴即使發揮普通水準，亦已經夠做。
今場除咗隊長表現一流，賓韋特亦相當出色，助攻助守，今場更有102次傳送，92%成功率，其中更有兩次超精彩長傳，佢能否喺英格蘭國家隊佔據正選一席，真係要睇修夫基點諗喇。
無論如何，阿仙奴目前已拋甩次席曼城5分，由於英超會喺聖誕後先復賽，亦即係話，阿仙奴已成為聖誕冠軍。今次係阿仙奴史上第3次聖誕冠軍，對上兩次(02/03、07/08)阿仙奴都畀曼聯破壞好事、未能笑到最後，但睇番近年數據，近10季聖誕冠軍，有7季都係最終王者，3次例外嘅都係利物浦。阿仙奴能否再嘗冠軍滋味？
