19歲嘅時候，大家做緊咩？曼聯新兵安東尼馬菲奧斯，喺19歲就已經做老竇，同年仲出咗本講壓力嘅著作，相當早熟，究竟呢位1億歐元先生，可唔可以同卡斯米路，打破巴西兵喺曼聯冇運行嘅魔咒？
22歲嘅安東尼，日前正式官宣，由阿積士轉投曼聯，好多人都質疑呢位巴西翼鋒，究竟可唔可以適應強度高過荷甲好多嘅英超？究竟可唔可以頂住1億歐元身價嘅期望同壓力？
安東尼10歲加入聖保羅青年軍，上年幫巴西拎咗東奧金牌，代表巴西國家隊9次入2球，喺右路用左腳Cut入中路相當耍家。
腳法係有，適唔適應到英超真係要踢過先知，不過安東尼抗壓嘅能力同成熟度，就應該幾高。安東尼19歲已經成為一子之父，同年仲出咗本抗壓書(Overcoming A Real Dream)，用日記形式，分享自己成為巴西新星嘅壓力、解決方法。
安東尼嘅早熟，早喺2020年2月轉投阿積士前已略見一、二，當時仲踢緊聖保羅嘅佢，已經受到曼城、愛華頓等嘅垂青及問價，但最終安東尼唔想一步登天，選擇加盟阿積士，周薪12,000鎊，直至轉會曼聯。
不過，曼聯出晒名係巴西球員嘅凶地，2002世盃功臣基巴臣，去到曼聯後傷患不斷，只係踢咗兩季就被賣去土超，之後路爾斯安達臣被費格遜寄予厚望，可惜踢唔出身價，只係後備居多，達施華兄弟、安達斯彭利拿同樣失敗告終，現時仲喺曼聯嘅費特，更被指係毒瘤之一，究竟卡斯米路嘅王者DNA、安東尼嘅超早熟可唔可以打破魔咒？拭目以待。
