唔止車路士，就連紐卡素都唔多掂。周日凌晨英超，紐記作客1:3慘負白禮頓，已經3連敗。18歲中鋒艾雲費格遜今仗大演帽子戲法，搶晒風頭。
開季後，紐卡素頭頭碰著黑，除開鑼戰擊敗阿士東維拉，之後即要作客曼城，輸波情有可原；但上仗主場對利物浦，於領先一球兼大部份時間多踢一人情況下，竟然反輸1:2，士氣大受打擊；之後歐聯又被抽入死亡之組，英格蘭聯賽盃第3圈，亦因為程序出錯要對曼城，黑到你唔信。
紐卡素球員的確有越踢越沉之勢，今仗完全唔夠白禮頓搶，後防又慢又疏忽，導致連失3球，睇吓經過國際賽期，16號英超重開主場對賓福特時，紐卡素可唔可以改善表現。
白禮頓上仗全面佔優，最終不敵當旺韋斯咸，但球員未有受影響，攻守依然正常發揮，佔據主動。
今仗焦點係18歲中鋒艾雲費格遜，完全無視紐卡素後防丹般恩、法比安舒哈，於27、65、70分鐘入波，成為第4輪賽事，除孫興民、艾寕夏蘭特之外，另一位大演帽子戲法球員。紐卡素完場前由哥林威爾遜破蛋。
艾雲費格遜上季嶄露頭角，一度係曼聯收購目標。白禮頓奇貨可居，絕不放人，等後生仔更成熟，隨時又係身價過億鎊球星。佢亦成為繼巴特威廉斯、科拿及奧雲（3次）之後，第4位18歲或以下完成英超帽子戲法嘅球員。
