【英超】1:1逼和水晶宮代價大 三笘薰受傷 撐拐杖離場;白禮頓傷兵問題雪上加霜

今晨英超獨腳戲,由水晶宮與白禮頓合演M23公路打吡,最終兩軍各一言和,不過本已傷兵滿營嘅白禮頓再收到噩耗,日本國腳三笘薰喺比賽末段受傷,完場後更要撐拐杖,情況令球迷擔心。

上仗發揮後勁、以2:2逼和曼城嘅水晶宮,今場一改踢法,攻勢亦係較多一方,上半場補時階段,白禮頓門將華布根交失波,奧拉斯輾轉拎到波後傳中,佐敦艾耶頭槌先開紀錄。

水晶宮下半場變番保守,而白禮頓就換入韋碧克、保拿洛迪提升攻力,去到82分鐘,白禮頓正正就由韋碧克建功,以1:1逼和水晶宮,搶番1分。

水晶宮雖然近期略為回勇,但數數吓已經7場聯賽未贏過,目前18戰積18分,排喺聯賽榜第15位。至於白禮頓則有27分,升上第8位。

白禮頓雖然執番1分,但代價極大,翼鋒三笘薰喺比賽尾段疑因足踝受傷離場,賽後甚至要着保護靴同埋用拐杖行路,傷勢唔輕。白禮頓領隊迪薩比話:「我依家真係唔清楚,要等檢查後先知道詳細情況。」

三球王賽後要撐拐杖離場。

事實上,白禮頓目前已飽受傷兵問題困擾,右閘韋特文上仗不敵阿仙奴時受傷,要抖兩個月;同時,主力翼鋒蘇利馬治已確定要提早收咧,季初極速彈起嘅恩斯素,亦至少要到二月底先可以復出,如果連三笘薰都傷埋,白禮頓都真係幾大鑊。