【英超】100″追和101″反勝!車路士神跡4:3挫曼聯 彭馬入3球 完美報復紅魔躉!

真正神劇情!周五凌晨英超,曼聯落後兩球之下,曾經連入3球反先,但畀高爾彭馬喺100分鐘扳平,101分鐘絕殺,最終曼聯作客3:4不敵車路士,爭入前4機會更渺茫,領隊坦哈格進一步走入倒數時刻。

早有消息指,如果入唔到前4,曼聯新領導層會換走坦克。今仗3分得而復失後,曼聯落後第4及5位嘅維拉、熱刺有11同9分之多,而今季賽事只剩8場,打入前4名嘅機會相當渺茫。

若然最終被炒,坦克亦唔抵可憐,曼聯今季賽事已經輸咗17場,當中包括12場英超、4場歐聯及1場聯賽盃,追平曼聯自1989-90賽季以來,單賽季輸波紀錄,連埋英足盃仲有最少9場波,相信必定會破紀錄。

車路士上仗主場打多個,仍然畀般尼追和2:2,美國老細連慣性入更衣室訓話都慳返,領隊普捷天奴更指球員只有英乙水準。班球員知恥近乎勇,今仗表現大有改善,開波19分鐘內,由干拿加歷查、高爾彭馬(12碼)射成2:0。

雖然車仔快手領先兩粒,但34分鐘出現超級無間道,1億鎊先生卡些度後場發鷄盲橫傳,加拿祖唔該一聲,得球後中路直推,近門射成1:2。5分鐘後,般奴遠柱無人看管下頂入,曼聯追和2:2完半場。

天價翼鋒安東尼,近幾場表現確係有改善,67分鐘,更送出一個精妙腳面傳中,由加拿祖頂成3:2,紅魔成功逆轉。不過坦克之後又嚟料,換走最有威脅嘅加拿祖,換入曼治,畀佢首次倒戈車仔,令曼聯失去突擊威力,只有捱打。

進入補時階段,更加掀起高潮,以為曼聯有機會捱到,點知去到97分鐘,達洛治因為轉身跑動時失平衡,非蓄意從後撞跌馬杜埃克,球證睇咗好耐VAR,決定判罰12碼,彭馬再做劊子手,100分鐘射成3:3。

101分鐘出現終極高潮,彭馬接應右路角球,k角位起腳射門,省中麥湯米尼改變方向入網,車路士戲劇性贏4:3,101分鐘,亦成為英超史上,最遲出現嘅致勝入球。

彭馬喺比賽期間,被曼聯躉喺比賽中途大唱:「你係曼城唔要嘅球員」。最終彭馬連中三元,以行動及勝利作出還擊,相當精彩。