梅迪歷開齋，車路士終於獲得久違嘅二連勝！今晨英超獨腳戲，車路士憑1億先生梅迪歷開齋、波查奠勝，短短82秒連轟兩粒，作客以2比0擊敗富咸，主帥普捷天奴暫時可鬆一口氣。
最近3個轉會窗口，車路士用咗超過10億歐元，但係表現一塌糊塗，開咧後6仗得1勝2和3負，係車仔自1978-79賽季以來最差嘅成績，今場擊敗富咸後，避免刷新最差紀錄之餘，同時收獲近4場聯賽首勝。
至於作為3大一億先生之一，梅迪歷上車已經有10個月咁耐，總共為車路士出戰24場，嚟到今仗，終於獲得第一個入球，而之前23場，只係得兩次助攻。
今場車路士用抖咗好耐嘅波查正選，頂替停賽嘅尼高拉積遜，配合梅迪歷、高爾彭馬攻堅，防中係卡些度同干拿加歷查，安素推前一格做攻中，而富咸三叉戟為魯爾占美利斯、哈利威爾遜、同埋倒戈嘅韋利安。
車路士喺18分鐘先開紀錄，梅迪歷心口控定高維嘅傳中，射入上車第一球，1分鐘後，富咸中堅添列姆犯錯，高爾彭馬截到個波再塞入禁區，列姆又出事，解圍省中波查入網，車路士82秒連入兩球，奠定勝局。
不過，車路士今場表現其實只係一般，尤其下半場更被富咸圍攻，全靠一條鋼鐵防線先力保不失；加上梅迪歷、波查同卡些度今仗先後傷出，普捷天奴賽後話前兩者只係輕傷，但卡些度就要再Check，可見普帥只係暫時鬆一口氣，下仗對般尼，都要再諗諗計點執喇。
