【英超】0:3負富咸 熱刺飄忽病又復發!錯過返前4機會 孫興慜:每個人都要照鏡認錯!

以為會食住上,點知又打回原形!周六英超尾場賽事,上場作客炒維拉4蛋嘅熱刺,今場作客竟以0:3不敵富咸,錯失重返前4嘅機會。表現勁飄忽,賽後孫興慜難掩失望,直言「每人都有錯」。

「今場波之後,我哋每一個人都要照吓塊鏡,同自己講『係我錯』!因為真係踢得唔好,甚至係一次非常、非常失望嘅演出,我認為所有人,都需要視今場波為一個警號。」

隨住今場爆冷後,熱刺目前28戰得53分續排第5,落後第4嘅阿士東維拉兩分、領先第6嘅曼聯6分。

熱刺李察利臣啱啱傷癒先列後備,孫興慜踢番9號位,班倫莊遜、古路錫斯基及麥迪臣支援,望落火力十足,但踢落就唔多掂,開賽到中段不停失控球權,富咸嘅逼搶有啲威力,去到上半場42分鐘,富咸由蒙尼斯先開紀錄,呢球亦係佢個人近7場入嘅第6球。

換邊後,富咸冇話一味死守,49分鐘,盧傑撞射得手、擴大比數成2:0。62分鐘,蒙尼斯梅開二度鎖定3:0勝局,繼2008年之後,再一次喺主場聯賽擊敗熱刺。