【英超】0:2負韋斯咸 曼聯4場不勝降至第8!攻守都唔掂 平34年單年輸波紀錄

周六英超,曼聯作客韋斯咸,被技術性擊倒,輸0:2,真正攻守都唔掂,好多紅魔迷提早離場冇眼睇。坦哈格出名多輸波解釋,今次應該都有嘅,又係個陣殘囉!

連埋今仗,曼聯2023年各項賽事已經輸咗20場,追平球會自1989年(20場)以來,單年輸波場次最多紀錄,佢哋年終前仲會對維拉及森林,睇吓坦哈格會唔會打破埋呢個塵封34年嘅紀錄。

曼聯上仗作客晏菲路,全力防守0:0迫和利物浦,今仗作客韋斯咸,同樣不被睇好,事關佢哋啲中堅傷晒,焗出只得19歲嘅青訓產品甘比華拉,另外備受好評嘅明奈亦正選登場。陣容太殘,難怪開賽前贏波賠率接近3倍。

甘比華拉表現平穩。

韋斯咸開波初段係威係勢,特別頭15分鐘,但曼聯防線頂得住,首次英超出場嘅甘比華拉亦冇慌失失,佢拍檔老將伊雲斯,更打出高水準,減輕小將壓力。曼聯自中段起,開始發動突擊,埋門威脅力比錘仔幫更大,可惜加拿祖近門射失,聯賽仲未入波嘅中鋒海倫亦繼續冇料到。

下半場初段,坦哈格唔再堅持,用拉舒福特入替海倫,但攻力冇增強之餘,防線更不斷受壓,亦開始頂唔住對手攻勢,漏洞暴增,最終逃唔過各項賽事連續4場不勝命運。

韋斯咸箭頭查洛保雲下半場開始嚟料,非常活躍,72分鐘取得今季第11個聯賽入球,進佔射手榜第2位。6分鐘後,明奈後場無端端漏踢,古達斯最後得球,禁區邊射死角入網,主隊終以2:0擊敗紅魔,以整場形勢計,係非常合理、優勝劣敗。

韋斯咸賽後18戰30分,升上第6位;曼聯降至第8位,18戰28分,比榜首阿仙奴少11分,兼且踢多1場。