英超車路士又輸一場！車路士周日晚英超9點場，主場以0:1不敵阿士東維拉，連續3場聯賽不勝，3場都食白果，開季6戰1勝2和3負，普捷天奴怕且好快又聞到魷魚香。
冇歐洲賽包袱、夏天瘋狂買人、教練又換埋，但仍然交唔到成績，鋒線疲弱無力，防守又不穩，呢隊車路士究竟搞咩？
車路士今場用一億先生摩西斯卡斯度踢正選，同干拿加歷查合作踢防中，安素費蘭迪斯推前一格任進攻中場，與梅迪歷、史達寧支援單箭頭尼高拉積遜。
弱隊出鋼門，20分鐘，維拉甸尼禁區外放冷箭，好彩羅拔山齊士救到。上半場尾段安素費蘭迪斯同維拉嘅意大利前國腳辛尼奧路，分別錯失入球機會，兩隊悶和返更衣室。
換邊後雙方繼續拉踞，轉捩點出現喺58分鐘，車仔新兵古斯度出收山腳，球證先判黃牌，但VAR介入，最終改判紅牌，車路士10人應戰下，被維拉圍攻，終於喺73分鐘，由奧利屈堅斯建功，維拉以1:0勝出。
至於畀車仔買晒防中卡些度同拉維亞嘅利物浦，卻越戰越勇，由沙拿、祖達及達雲紐尼斯入波，以3:1擊敗黑馬韋斯咸，6戰5勝1和，目前僅落後榜首曼城2分。
